Pinatanidan ni Ombudsman Jesus Crispin ‘Boying’ Remulla an Kamara de Representante dapit sa suboot dae kaini pagrespeto sa ipinadarang subpoena kan ahensya.
Partikular na pinatanidan kaini an mismong Secretary General kan House of Representatives na si Cheloy Garafil.
Segun ki Ombudsman Remulla, na kan magpadara nin ‘subpoena’ an tanod-bayan, dae ini pigresibe maski kan security kan Kamara.
Hagad kaya sa kasuguan na makuwa an kopya kan Statement of Assets, Liabilities, and Net Worth kan saro sa mga empleyado kaini.
Obheto kan nasabing ‘subpoena’ na makuwa an SALN partikular kan pinangaranan na si House Deputy Secretary General Sofronio Gabonada.
May kinaaraman ini sa ipighahanda na kasong plunder kontra sa mga kongresista na imbwelto sa maanomalyang flood control projects.
Huli digdi, nagpatanid si Ombudsman Remulla na dae papalagpason an pagpasipara kan Kamara sa opisina kan tanod-bayan.
Afuera digdi, nagtao nin ‘ultimatum’ si Ombudsman Remulla sa House Secretary General na kun dae maitatao an hagad na kopya kan SALN ngunyan na semana, suspensyon an padusang ipapataw sa nasabing opisyal kan kongreso.
Sa ipinaluwas man na pahayag ni House Secretary General Garafil, sinabi kaini na dakula an pagrespeto kan saiyang opisina sa Office of the Ombudsman.
