Positibo an Office of the Ombudsman na masusundan pa an saindang pagsunad nin kaso sa Sandiganbayan kontra sa mga imbwelto sa flood control projects anomaly.
Makalihis an pagsangat kan enot asin ikaduwang major flood control cases sa Sandiganbayan, kampante an Ombudsman na makakasangat sinda nin bagong mga kaso.
Ini mismo an inasigurar ni Assistant Ombudsman Mico Clavano kan sabihon kaini na posibleng maisangat na ninda an masunod na kaso ngonian na semana.
Igwa man suboot nin mga flood control cases na preparado na alagad aminadong kaipuhan pa man giraray na masierto an kalidad kan mga ini ngani na magtindog bilang sarong kaso.
Pagdoon niya na dae ninda habol na magpakitang gilas sana kundi obheto kan tanod-bayan na tunay mapanimbag an mga imbweltong indibidwal sa korapsyon kan flood control.
Tinawan man niya nin duon na dapat pusog an isinangat na kaso asin may kaibang ebidensya asin bako sana basta pwedeng isasangat sa korte.
Dagdag pa ni Assistant Ombudsman Clavano, an mga kasong saindang tinutukan an bako pare-pareho huli ta an nagkapira an magkakaiba partikular sa mga ebidensyang naguno na mas matibay kumpara sa iba.
Mas madali suboot na madeterminar an responsibilidad kan sarong imbwelto kun siguradong nagpapahiling sa kapot na ebidensya na nagpapahiling na nakaresibe siya nin kwarta hale sa anomaliya.
Huli kaini, pig-anunsyo ni Ombudsman Spokesperson Mico Clavano na makakasyerto an publiko na ginigibo ninda an gabos nganing mapanimbag an mga imbwelto sa korapsyon.
Alagad aminado ini na dae pa sinda sigurado kun nuarin an eksaktong petsa para sa pagsangat nin mga bagong kaso sa korte na may kinaaraman sa flood control.
Importante suboot na timbangon o hilingon an kusog kan kasong saindang isasangat laban sa mga imbweltong indibidwal.
