LEGAZPI CITY — Ipinagsugo na kan Office of the Ombudsman ki Catanduanes Governor Joseph Cua asin duwa pang opisyal an pagsumiter nin simbag sa kasong kriminal asin administratibong isinangat kontra sainda katakod kan pagkakadiskubre sa pigsasabing mega shabu laboratory sa saindang probinsya kan nakalihis na taon.
Pirmado an kasuguan ni Deputy Ombudsman for Luzon, Director Adoracion Agbada bilang simbag sa reklamong isinangat ni Edralyn Pangilinan, esposa kan ginadan na kolumnistang si Larry Que.
Kasabay ni Cua sa sinangatan nin kasong graft and gross negligence sinda Virac Mayor Samuel Laynes asin Barangay Palta Small Chairman Hilario Tomagan Sarmiento.
Kun babalikan, nabigla an bilog na rehiyong Bicol sa pagkakadiskubre sa dakula asin modern shabu laboratory sa Barangay Palta Small, Virac kan Nobyembre 26.
Sa pagkarkulo kan mga otoridad, may kapasidad ining magproduce nin 9.6 na tonelada nin shabu kada bulan.
