Pigsusuri na kan Office of Civil Defense (OCD) an hewas kan epekto kan magnitude 7.4 na linog na nagsentro sa Davao kun saen nag-abot sagkod sa tulong iba pang rehiyon sa Mindanao.
Basado sa report kan mga regional office kan OCD, naapektaran kan linog an mga rehiyon kan Caraga, Soccsksargen asin Northern Mindanao.
Segun ki OCD Assistant Secretary Rafaelito Alejandro IV nakapag-report na an regional office nin mga inisyal na danyos sa manlaeng-laeng pampublikong istraktura siring kan mga edificio, tinampo asin mga tulay.
An mga ini an suboot nag-agi sa validation nganing masiertong akma an magigin report kan OCD na pagbabasehan kan mga isasagibong rehabilitasyon asin humanitarian operation sa mga nasabing mga rehiyon.
Sa presente nasa Davao an haralangkaw na opisyal kan OCD para sa pagsusuri asin evaluation sa epekto kan linog sa mga komunidad.
Pinangengenotan man kan mga regional office kan OCD an pakikipagkoordinar sa mga lokal na gobierno nganing makalikom nin mga impormasyon mapadapit sa danyos.
Kabale sa inisyal na natukoy digdi an haros 400 eskwelahan na nagsapo nin mga bitak asin nagbagsak na parte, mantang pirang tulay, tinampo asin pampublikong edificio na man an nabisto na nagsapo nin destroso.
Sa presente wara man suboot na problema sa komunikasyon, sa ibong kan epekto kan linog sa communication lines sa dakulang parte kan Mindanao.
