LEGAZPI CITY – Nakabandera na an red alert status an regional emergency operation center kan Office of Civil Defense Bicol bilang preparasyon sa posibleng epekto kan pigbabantayang low pressure area asin Southwest Monsoon o habagat.
Segun ki Office of Civil Defense Bicol Spokesperson Gremil Naz sa intrevista kan Bombo Radyo Legazpi na sa nangyaring pagbabaha sa Barangay Masarawag Guinobatan, Albay an nagkawsa sa pag-ebakwar kan maabot sa 74 pamilya o 186 na katawo mantang pighahalat pa ninda an kompirmasyon hale sa Municipal Disaster Risk Reduction and Management Office kun nag-decamp na ini ngonian.
Afuera suboot sa Barangay Masarawag an wara pa sindang nairehistrong pagbaha sa enterong rehiyon sa nakalihis na magdamlag basado sa datos kan saindang operation center alagad pagsyerto man niya na padagos an saindang pag-update sa mga Local Government Unit.
Ipigbandera ninda an nasabing alert status nganing mamantenir an halangkaw na lebel kan koordinasyon sa pagultangan kan saindang ofisina asin mga Provincial Disaster Risk Reduction and Management Offices.
Pigtaram pa kan opisyal na afuera sainda an naka-standby na man an mga Local Disaster Risk Reduction and Management Officers mga personnel kaini nganing magresponde enkasong may mangyaring dae piglalaoman sa mga masunod na oras.
Pagirumdom ni Naz sa publiko na permihang magtutok sa advisory kan mga state weather bureau mapadapit sa kamugtakan kan panahon asin an permihang pag-iingat mantang syertuhon na nasa ligtas na lugar an saindang sadiri asin pamilya.
