LEGAZPI CITY—Mantenidong nangengenot na nairehistrong bayolasyon kan mga motorista an obstruction sa ciudad nin Legazpi.
Segun ki Legazpi PSO Chief Octavio Rivero, sa intrevista kan Bombo Radyo Legazpi, na ini an komon na nakokomiter kan mga pampasaherong lunadan magin kan mga pampribado na nagraralaog sa nasambitan na ciudad.
Dugang kan opisyal na magkakaigwa sinda nin information branch sa kada TODA para ieksplikar an mga programa kan saindang opisina asin iheras an mga ordinansa sa ciudad ngani maibitiran an buhol-buhol na trapiko sa lugar.
Pigpaplano man kan saindang opisina na magbugtak nin mga motorist assistance complaint desk sa mga piling lugar sa ciudad para sa may mga mawot na magreklamo asin para matawan tulos na aksyon an siring na mga bayolasyon.
Tinawan-doon kaini na sa ibong kan mga tuyaw na nareresibi sa saindang paghihigot sa pagmanehar kan sitwasyon, giit ni Rivero na piggigibo man sana ninda an saindang mga trabaho.
Pighayag man kan opisyal na kulang pa an mga personahes kan Public Safety kaya naghahagad sinda nin mga 20 katawo para mahiling asin masakop kan mga personahes an sitwasyon sa bilog na ciudad.
Mientrastanto, nangapudan man si Rivero sa mga motorista na ibitaran an pagparada sa mga may sign board na “No Parking” ta posible sinda na matiketan kan saindang mga personahes, mantang nangapudan man ini sa mga tricycle drivers na dae pa nagpupundo kan overcharging asin mga colorum na dae na ini paggibohon sa ciudad kan Legazpi huli ta may programa sinda nin “No Colorum, No Overcharging”.
