Matrayumpo asin nagin maayos an naging inisyal na assessment kan Philippine National Police (PNP) para sa naging kabilogang obserbasyon kan Holy Week Exodus ngunyan na taon.
Segun ki PNP Chief PGen. Jose Melencio Nartatez Jr., warang mga nairehistrong mga major incidents na nakaapektar sa kabilogang obserbasyon kan Lenten Season.
Segun saiya nagtitinir na prayoridad kan pulisya an salbadong pagbabalik kan mga biyaheris makalihis an labi sa sarong semana na itinagama nganing magnilay-nilay.
Kasunod kaini, inihayag ni Nartatez na bilang pagpapahiling kan saindang pagtatao nin importansya sa kaligtasan asin kaayusan an magtitinir nakabugtak sa manlaen-laeng mga lugar an haros 98,000 na miyembro kan PNP.
Ini an ipinakalat sa manlaen-laeng pasyaran sa nacion, mga transportation hubs asin magin sa mga pangenot na tinampo.
Makalihis ini an liwat man na nagpagiromdom an hepe sa mga motorista na magtinir na kalmado sa saindang mga pagbiyahe asin likayan an paglakop nin road rage incidents.
Mientrastanto, magtitinir man na nakataas an antas kan alerto kan kapulisan nganing masierto na magigin maayos an mga biyahe kan mga mananakay asin salbadong makakauli sa saindang mga harong an mga ini.
