(Update) LEGAZPI CITY- Arestado na kan mga otoridad an pigsasabing lider kan rebeldeng New People’s Army (NPA) makalihis an nangyaring engkwentro sa Sitio Pino, Barangay Ban-ao, Placer, Masbate.
Nakahampang kan pulisya an poco mas o menos 15 miembro kan pigtutubudang mga rebelde.
Kapot na sa ngonian kan mga otoridad si Ernesto Pino alyas “Ka Bunso” na naarestar mantang nasa ospital tangarig magpabulong sa sinapar na lugad huli sa engkwentro.
Sa eksklusibong intrevista kan Bombo Radyo Legazpi ki Police Major Ruel Pedro, hepe kan Placer PNP, tulos na nagdesignar nin checkpoint an mga otoridad asin nagsagibo nin hot pursuit operation kontra sa grupo.
Hasta sa makaresibe nin impormasyon an mga otoridad na idinalagan an suspek sa sarong ospital sa Masbate kun sain duman ini inarestar.
Napag-araman na nagkapirang bulan naman na pigmomonitor kan mga otoridad an hiro kan grupo na suboot nanghaharass sa mga sibilyan asin pinagtutubudan na nagsisirbe man na private armed group (PAG) kan pulitiko.
Sa ngonian, sasangatan na nin magkakanigong kaso an suspek mantang padagos pa an operasyon kan mga otoridad tangarig madakop an mga pag-iriba kaini.
