LEGAZPI CITY- Panggigipit asin panggagatas suboot an presenteng pigigibo ngunyan kan lokal na gobyerno kan Legazpi City sa mga tricycle drivers sa syudad.
Ini an tinawan duon kan transport leader na si Dante Marigondon.
Pahayag kaini, mismong an mga tauhan man sana kan BCERG an nanginginabang sa No Entering the National Road Policy na nagbabawal sa mga tricycle na maglaog sa Rizal St.
Ini huli suboot sa komisyon na makukua kan lambang enforcer na makakadakop nin nagbabalgar sa nasambitan na ordinansa.
Dugang pa ni Marigondon, obheto sana kaini na makakua nin pondo alagad nata ta an mga tricycle drivers pa an kaipuhan na pagkolektahan.
Ini man an saro sa pighihiling na rason kan transport lider sa overcharging asin panghohold-up kan nagkapira huli na man ta dae nagigin bastante an dilensya sa aro-aldaw na pasada.
Hagad ngunyan ni Marigondon na dangugon kan lokal na gobyerno an saindang lado kasabay na an diit na pagkaherak ngani na matabangan suboot an mga para-tricycle sa syudad kan Legazpi na magkaigwa nin kaginhawaan sa saindang pagkabuhay.
