LEGAZPI CITY- Ikinaugma kan National Nutrition Council Bicol an pahayag ni Presidente Ferdinand Marcos Jr. na whole of nation approach sa pagresolbar sa problema sa kagutuman sa nacion.
Segun ki National Nutrition Council Bicol Program Coordinator Arlene Reario sa intrevista kan Bombo Radyo Legazpi na sa presente nagtetenir sa 30% an mga nagugutom sa nacion kun sain 2% an nakaka eksperyensya nin severe hunger.
Huli digdi, nasa 26% sa bagong pangaki na mga umboy asin edad 5-anyos pababa an nagtetenir na malnourished.
Paliwanag kan opisyal na huli sa matinding kagutuman, dae naitatao an bastanteng nutrisyon na kinakaipuhan kan mga namamanwaan urog na kan mga kaakian.
Dugang pa ni Reario na an kampanya kontra sa kagutuman an nagpapahiling na seryoso an nacion na otobon an obheto na pagkakaigwa nin food security asin labanan an malnutrisyon.
Napag-araman na saro sa mga kampanya kan ahensya iyo an pagtatao nin technical assistance sa mga lokal na gobierno na nangangaipo nin tabang.
Partikular na tinukoy kan opisyal an pagtatao nin bastanteng nutrisyon sa mga bados na kababaihan asin sa enot na 1,000 days kan mga umboy.
