LEGAZPI CITY- Nangapudan an National Nutrition Council Bicol sa kada pamilyang Bicolano na siertuhon na mga masustansyang pagkaon an ipapakaon sa kada pamilya ngunian na selebrasyon kan family day asin Kainang Pamilya Mahalaga Day.
Kun babalikan, nagpaluwas nin memorandum circular 64 an Malacañang kan nakalihis na semana dapit sa pagpapaalipot sa oras kan trabaho sa gobyerno ngunian na aldaw kun saen mauli an mga government employees nin alas 3 sa pagkahapon ngani na iselebrar kasabay kan saindang pamilya an Family Week asin Kainang Pamilya Mahalaga Day.
Segun kay Arlene Reario,an Nutrition Program Coordinator kan National Nutrition Council Region V sa intrevista kan Bombo Radyo Legazpi, importante an selebrasyon na ini lalo na sa mga working parents kun saen matatawan ninda nin oras an saindang pamilya.
Segun pa sa opisyal na importante man na mga masustansyang pagkaon an saindang kakaunon kun saen kaipuhan na magkaigwa nin tamang nutrisyon an kada pamilya.
Dakula man suboot an magiging epekto kan family day sa mga kaakian kun saen amay na mauli an saindang mga magurang asin dapat na maipasabot sainda an kahalagahan kan nasabing okasyon.
Mientrasatanto,padagos man an kampanya kan ahensya ngani na magbaba an kaso kan malnutrsiyon sa rehiyon.
Sa ngunian, may diit na pagbaba sa bilang kan malnutisyon sa Bicol kun saen igwang 10.09% an stunting o pagkabansot na igwang 1% na pagbaba kun ikukumparar kan nakalihis na taon.
