LEGAZPI CITY-Naghalangkaw sa US$69.3 bilyon (P3.88 trilyon) an net external liability kan Pilipinas sa pagtatapos kan Marso 2025, mas halangkaw ini kaysa sa US$65.5 bilyon (P3.67 trilyon) kan Disyembre taon 2024.
Resulta ini kan makaskas na paghalangkaw kan foreign investments sa Pilipinas kaysa sa pondong ibinugtak kan nacion sa ibang bansa.
Naitala an kabilogang external debt sa US$326.8 bilyon (P18.31 trilyon) mantang an panluwas na asset nasa US$257.5 bilyo (P14.42 trilyon).
Sa taonan na datos, luminubo nin 17.2% an net external liability hale sa US$59.1 bilyon (P3.31) trilyon kan Marso kan nakaaging taon.
Pinakadakulang parte kan foreign investments na igwang 56.1% napaduman sa ibang sektor siring kan mga pribadong korporasyon, households asin non-profit.
Mientrastanto, an Bangko Sentral ng Pilipinas man giraray an igwang pinakadakulang parte na nasa 43.3% sa pondong pigtatalaga kan nacion sa mga dayuhang asset.
