LEGAZPI CITY – Pighahalat na sana kan National Bureau of Investigation (NBI) an ibababang resolusyon sa ipigsunad na reklamong inciting to sedition kontra sa website creator kan ” Ang Totoong Narcolist” na kinatatampukan ni Bikoy asin mga alegasyon kontra sa first family dapit sa illegal drug trade.
Sa ekslusibong intrevista kan Bombo Radyo Legazpi ki NBI Cybercrime Division Chief Victor Lorenzo, very cooperative man suboot si Rodel Jayme na positibo tangarig na masusog kan ahensya an tamang direksyon kan imbestigasyon.
Kapot naman kan NBI an laptop asin phone ni Jayme na isinasairarom sa forensic examination.
Segun ki Lorenzo, may pattern na suboot na nahihiling kun kiisay nakikipag-communicate si Jayme na posibleng makakapagtukdo kan intensyon sa paggibo kan site.
Idinescribir pa ni Lorenzo si Jayme na “knowlegeable” sa paggamit nin computers mantang self-learned man suboot an pagkaaram sa paggibo nin website.
Pig-aaram naman sa ngonian an identity kan sinasabing nagpagibo suboot nin website ki Jayme.
