LEGAZPI CITY – Nadukayang nagpapalataw-pataw asin wara nang buhay an sarong parasisira sa munisipalidad kan Caramoran sa provincia kan Catanduanes.
Segun ki Caramoran Municipal Disaster Risk Reduction Management Office Local Disaster Risk Officer 1 Denver Carascal sa intrevista kan Bombo Radyo Legazpi na binisto an biktima na si Joven Galicia, 45 anyos, asin residente kan Barangay Camburo kan kaparehong munisipalidad asin provincia.
Nagpasiring suboot sa saindang opisina an tugang kan biktima kun sain ipigreport kaini na nawawara an biktima makalihis na magpalaot nganing magkuwa kuta ki pangkaon asin dae na nagbalik.
Nahiling an bangkay kan biktima sa kadagatang sakop kan Barangay San Andres, banwaan kan Pandan kan kaparehong provincia na tulos man dinuman kan saindang team, manlain-laing rescue unit asin kan mga Barangay Official kan Barangay Camburo nganing kuwaon an hawak kan biktima.
Pigtaram pa kan opisyal na basado sa saindang inisyal na imbestigasyon na pwedesir na inatake sa puso an biktima mantang papabalik na ini na nagin rason kan saiyang pagkagadan.
Wara man na kaibahan an biktima kan magpalaot nin huli ta harani lang suboot an saiyang harong sa pig-layagan kaini.
Pagirumdom ni Carascal sa mga nasasakupan nindang nasa coastal barangay na dae na magpalaot kun may pigmamate nin huli ta delikado an mga siring kaining gawi asin pirming magpasiguro nin life vest nganing magamit enkaso may mangyaring maraot mantang nasa dagat.
