LEGAZPI CITY- Padagos an pagsierto kan National Meat Inspection Service Bicol sa food safety sa rehiyon.
Ini makalihis na liwat na makapagrehistro nin mga kaso kan African Swine Fever sa nagkapirang parte kan rehiyon.
Segun ki National Meat Inspection Service Bicol Director Dr. Alex Templonuevo sa intrevista kan Bombo Radyo Legazpi na kun igwang mga kaso na igwang sintomas kan helang an sarong urig na pigdadara sa mga slaughter house, tulos ining isasairarom sa antimortem inspection asin gagadanon antes na ilubong ngani na dae na maka infect.
Kun na-detect kaya suboot an virus sa laog kan slaughter house, kaibanan sa proseso an pagpapapundo kan operasyon kaini asin pasasagibo nin disinfection sa bilog na premises asin sa mga ekipahe.
Nilinaw man kan opisyal na kun sa luwas pa kan slaughter house na-monitor an sintomas o an virus, an lambang munisipyo o mga provincial veterinary offices na suboot an magko-kontrol kan hiro kan mga ipigba-biyahe na mga urig.
Dugang pa ni Templonuevo na kun hali sa infected area an mga urig, may mga protocol na kinakaipuhan na sunudon siring kan pagkuwa nin veterinary certificate asin shipping permit hali sa Bureau of Animal Industry.
