LEGAZPI CITY- Nasa P5.95 million na pondo an itinagamang alokasyon para sa relocation site kan mga residente kan banwaan kan Libon na nasa landslide prone area.
Ini huli ta hasta sa ngunyan, nasa 100 na mga pamilya hali sa Purok 2, 3, asin Purok 4 kan Barangay Burabod an nagtetenir sa saindang mga kaparientes huli sa pagrasay nin daga sa saindang lugar.
Segun ki Libon, Albay Mayor Das Maronilla sa intrevista kan Bombo Radyo Legazpi na pighahalat pa ngunyan kan lokal na gobierno an approval kan Mines and Geosciences Bureau na namamayo sa inspeksyon kun salbado an napili na mga relocation areas.
Aminado man an alkade na an nasabing pondo an para sana sa pagbakal nin lote asin wara pa an mismong pagpapatugdok nin harong.
Napag-araman na magigin prayoridad man an nasa 32 na mga pamilya na direktang naapektaran kan nangyaring landslide durante kan pangrarapado nin raot nin panahon sa provincia kan Albay.
Sa nasabing datos, siyam na household an nagboluntaryo na gamiton an sadiri nindang mga daga na pwedesir na paglipatan alagad naghahalat pa nin tabang para sa pagpapatugdok nin harong.
