LEGAZPI CITY- Ipigheras kan Mines and Geosciences Bureau (MGB) Bicol na nasa kabilugang 128 quarry operations na sa buong rehiyon an isinairarom sa evaluation katakod kan ipinaotob na suspension order ni Environment Secretary Roy Cimatu sa paghiling sa mga quarry site na nasa hazardous areas.
Sinabi ni MGB Bicol Director Engr. Guillermo Molina Jr. sa intrevista kan Bombo Radyo Legazpi na 77 sa mga ini an tinugutan nang liwat na makapag-operar alagad nasa 51 na operasyon an mantenidong suspendido susog sa rekomendasyon sa lokal na gobierno.
Segun ki Molina, nahilingan an iba nin kawaran nin permit kun kaya tulos na pig-isyuhan nin cease and desist order mantang an iba man an nahilingan nin pagbayolar sa safety and environmental standards na dapat munang matawanan nin aksyon antes na liwat na makabalik sa pag-quarry.
Ipigbuyagyag pa ni Molina na igwang sarong quarry operator sa Albay na kan nakaaging Abril pa kan tawanan kan nasabing orden alagad ipigdagos man giraray an operasyon kun kaya pighahanda naman an magkakanigong legal na lakdang.
Inasegurar pa kan opisyal an pag-imbestigar sa mga nanotaran na over-extraction sa mga quarry areas na suway sa inaprubahan na permit kan mga ini.
Mientras tanto, naglalaom man an opisyal na maaaprubahan an kasunduan na pighahagad sa mga provincial governments sa rehiyon na makapag-evaluar sa mga quarry operations sa kada lokal na gobierno an MGB afuera pa sa ipigkokondusir kan Provincial Manning Regulatory Board.
