LEGAZPI CITY-Inatendiran kan nasa 250 na mga estudyante hale sa manlain-lain na eskwelahan an isinagibong “Bida sa Firesquare” roadshow kan Bureau of Fire Protection Legazpi.
Segun kay Legazpi City Fire Station Public Information Officer Fire Officer 2 Norman Andes, sa intrevista kan Bombo Radyo Legazpi na pigsasagibo ini ngani magbarewas nin kaaraman sa fire safety asin fire prevention.
Kasabay kaini, tinukduan an mga partisipantes nin basic skill na pwedesir gamiton enkaso igwang emerhensya, siring kun pano maapula asin maibitaran an kasulo, kun pano magsagibo nin first aid asin iba pa.
Dagdag pa kan opisyal na importante ini ngani magkaigwa nin kaaraman asin makapag-responde an mga estudyante sa enkaso igwang kasulo.
Regular man na pigsasagibo ini kan ahensya sa manlain-lain na eskwelahan asin barangay ngani makatabang sa pagbabarewas nin kaaraman sa fire safety.
Pagirumdom kan opisyal na dai mag-overuse kan mga appliances ngani dai ini magkawsa nin kasulo.
Katakod kaini, pig-eenganyar man an publiko na makisumaro sa ibang mga aktibidad kan ahensya ngonian na fire prevention month.
