Nasa 80 sagkod 100 Pilipino sa Dubai ang nagpahayag kan saindang intensiyon na bumalik na sa Pilipinas huli sa naglalalang tensiyon sa Middle East, susog sa Department of Migrant Workers (DMW).
Alagad huli sa sarado pa an himpapawid, sinabi ni DMW Secretary Hans Leo Cacdac na pigtatabangan kan gobierno an mga apektadong OFW, kabale an transportasyon pasiring sa mas ligtas na lugar asin suporta sa laog kan nacion mantang naghahalat kan repatriation.
Dugang pa niya nagtatao man an ahensya nin mga pangenot na pangangaipuhan siring kan pagkaon asin tubig mantang pighahalat an pagbubukas kan mga exit point o an liwat na operasyon kan eropuerto sa Dubai nganing maisakatuparan ang repatriation.
Susog sa Department of Foreign Affairs, nasa pocomas o menos 2.5 milyong Pilipino an nasa Middle East, kun sain kadaklan digdi an yaon sa United Arab Emirates, Saudi Arabia asin Qatar, asin nasa labi 800 Pilipino an yaon sa Iran.
Sumiklab ang tensiyon sa rehiyon kan nakalihis na weekend kasunod kan pag-atake kan Estados Unidos asin Israel laban sa Iran.
Tinawan-doon ni Cacdac na wara pang mahewasang repatriation sa Middle East, alagad preparado an gobierno na tabangan an mga apektadong Pilipino na makauli kun kinakaipuhan.
