LEGAZPI CITY-Ipigsugo kan National Police Commission (NAPOLCOM) an pagsibak sa serbisyo kan 11 pulis na suboot konektado sa missing sabungeros case sa hiwalay suboot na mga insidente kan pagdukot kan taong 2021.
Sa sarong pahayag, nahilingan na igwang administratibong paninimbagan an 11 pulis hale sa Regional Drug Enforcement Unit of the National Capital Region Police Office (RDEU-NCRPO) sa 2 counts kan Grave Misconduct asin 2 counts kan Conduct Unbecoming of a Police Officer.
Pinangaranan an mga pulis na napatunayan kan Commission En Bnc na liable, na sinda:
Police Lieutenant Colonel Ryan Jay E. Orapa
Police Major Mark Phillip S. Almedilla
Police Senior Master Sergeant Mark Anthony A. Manrique
Police Staff Sergeant Edmon H. Muñoz
Police Staff Sergeant Robert Allan E. Raz, Jr.
Police Staff Sergeant Denar S. Roda
Police Corporal Alric M. Natividad
Police Corporal Reynaldo G. Seno, Jr.
Police Corporal Ronald John V. Lanaria
Patrolman Rufino Miguel D. Panghulan
asin Patrolman Develyn M. Tapalla.
Susog sa NAPOLCOM, nag-poon an kaso sa mga reklamong naenot nang isinangat sa komisyon ni Milagros Estacio asin Elizabeth Sotto kan Setyembre 3, 2025, kun saen tinuro ninda an nasabing mga police officers na imbuelto sa pagdukot kan saindang mga aki na lalaki sa ikinasang magkahiwalay na anti-drug operations kan taong 2021.
Sa saro pang press briefing kan NAPOLCOM, ipigheras kan mga complainant an posibleng koneksyon sa pagultanan kan mga kaso asin sa nai-report na pagkawara kan nagkapirang sabungeros.
Nagluluwas man sa record kan Pebrero 17, 2021 sa Maynila, na dinukot suboot kan mga respondent si Dane Mark Carlos, mantang kan Marso 24, 2021 sa Las Piñas City, dinukot man si Charles Dean Sotto.
Susog sa NAPOLCOM, an siring kaining mga aksiyon, nagbabayolar sa Memorandum Circular No. 2016-002 kan komisyon kun sain kabale an kidnapping bilang Grave Misconduct asin Conduct Unbecoming of a Police Officer.
