Nag-iimbestigar na an mga otoridad sa suboot hazing incident sa Philippine National Police Academy (PNPA) na imbuelto an nagkapirang kadete.
Sinabi pa kan National Police Commission (NAPOLCOM) na mabilog sinda nin task force nganing tutukan an imbestigasyon.
Segun ki Napolcom vice chairperson Rafael Vicente Calinisan, labing makahandal asin malinaw na pagbalgar kan ley an nasambitang pangyayari, asin nuarin man an dae ini katanggap-tanggap.
Dugang pa kaini, tulos na magibo nin mahiwas, patas, asin marikas na imbestigasyon an NAPOLCOM ngani na maaraman an totoo asin mapanimbag an mga imbwelto.
Mientrastanto, sinabi kan Philippine National Police (PNP) na tulong kadete an yaon ngonian sa kustodiya kan Criminal Investigation and Detection Group (CIDG) katakod kan pigtutubudang hazing sa labi sa 20 plebo sa laog kan PNPA Barracks 2 kan Biyernes Santo.
Segun sa report, nagsapo nin paso asin iba pang lugad sa saindang hawak an mga biktima makalihis na suboot ma-expose sa pinaghalong drain cleaner asin muriatic acid.
Nag-iimbestigar man an mga otoridad sa pitong iba pang dae pa nabibistong indibidwal na posibleng may kinaaraman sa insidente.
Basado sa inisyal na imbestigasyon, nag-ugat suboot an hazing sa internal issue, kun sain gustong magdemitir na kan sarong kadete, kun saen an mga underclassmen an suboot pinadusahan makalihis na basulon sa nasambitan na sitwasyon.
Segun ki PNP chief General Jose Melencio Nartatez Jr., ipinagsugo na niya an tulos na pag-arestar asin pagsangat nin kaso kontra sa mga imbweltong kadete.
Ipinagsugo man ni Nartatez an pagbilog nin secure asin anonymous digital reporting system nganing maireport kan mga kadete an pang-aabuso na warang takot sa pagbalos.
 involving several cadets.){kind=link}