Sinigurado ni Senate Blue Ribbon Committee Chairman Ping Lacson na lilinawon kan saiyang komite an napabaretang recantation kan mga BGC Boys na imbwelto sa flood control anomaly.
Kinababalehan ini kan tolong dating DPWH Engineers na sinda Henry Alcantara, Brice Hernandez, asin Jaypee Mendoza.
Kung magigirumdoman, napabaretang gustong bawion kan tolo an saindang mga naenot na pahayag dapit sa mga alegasyon nin mga anomaliya sa flood control projects.
Sa ibong kan makusog na pinahimutikan kan kampo kan nasabing Engr. an mga report na ini, segun ki Lacson, personal niyang ipapaliwanag asin hahapoton sa hearing na gigibuhon ngonian na maabot na Lunes kun igwa nin siisay man o arin man na grupo na nagporbar na impluwensyahan o baguhon an saindang testimonya.
Ini an nganing masyerto na an gabos na impormasyon maibali asin nakalista sa opisyal na rekord kan komite.
Dugang pa ni Lacson, enkaso magbago an saindang testimonya sa hearing, igwa man liwat siyang supisyenteng ebidensya asin dokumento na mapatunayan laban sa sainda asin sa mga indibidwal na saindang idinawit sa nasambitan na mga anomalya.
Sa presente, padagos na nakakulong asin nagtetinir sa kustodiya kan Senado si Alcantara, Hernandez, asin Mendoza mantang nagpapadagos pa an imbestigasyon.
