LEGAZPI CITY — Nilinaw kan pamayuhan kan 901st Infantry Brigade, 9th Infantry (Spear) Division, Philippine Army na beripikado an impormasyong nakukua kan militar dapit sa presensya nin rebeldeng New People’s Army (NPA) sa sarong lugar antes na magkondusir nin operasyon.
Enot kaini, pinahimutikan ni Kapitan Reynold Orante kan Barangay Bololo sa banwaan kan Guinobatan na wara suboot na nangyaring engkwentro sa pagultanan kan militar asin NPA sa saindang lugar kan Marso 31 asin sa kataid suboot ninda ining lugar na Barangay Agpay.
Sinabi kan kapitan na nagpaputok sana an mga militar na wara man kalaban asin basta sana naglalaog sa harong na daeng darang search warrant, dae nakasulot nin uniporme, daeng nameplate asin dae naghahagad nin koordinasyon sa opisyal kan barangay.
Sinabi pa kan opisyal na miyembro suboot an mga ini kan 13th IB kan militar.
Katakod kaini, nilinaw ni Brigadier General Claudio Yucot, commanding officer kan 901st Infantry Brigade, pirming nakasulot nin uniporme an saiyang personahes bilang pagsunod sa protocol kun kaya an mga pigsasabing dae nakauniporme an miyembro suboot kan NPA.
Maduon pang sinabi ni Yucot na warang 13th IB an militar siring kan pigsasabi ni Kapitan Orante kundi 83rd IB sana.
Haloy naman suboot na pigkokordon kan NPA an Barangay Bololo kun kaya sa paghiling kan opisyal, nauto na an mga residentes kan rebeldeng grupo.
An iba suboot sa mga residentes kan lugar an posibleng dae makataram nin totoo huli sa takot para sa saindang buhay asin an iba digdi an “sympathizer” na kan NPA.
