LEGAZPI CITY – Nag-abiso an City Government of Legazpi sa nagkapirang tinampo na ipapasarado kasunod kan aktibidad kan Ibalong Festival 2019.
Sa Domingo, Agosto 18 nakatalaang isagibo an Mount Mayon Triathlon na papartisiparan nin mga atleta hali sa lokalidad hasta sa manlain-lain na parte kan kinaban.
Sa intrevista kan Bombo Radyo Legazpi ki Mayor Noel Rosal, parte kan kaogmahan asin pagpapakusog sa sporting event an pagsasarado sa tinampo puon sa Sto. Domingo hasta sa ciudad kan Legazpi na piglalaomang makakaapektar sa mga biyahero na hali sa primer distrito asin northern barangays kan ciudad.
Naghagad man nin dispensa an alkalde para sa mga apektadong ciudadano.
Puon alas-4:00 nin maagahon hasta alas-10:00 nin aga an magigin dalagan kan road bike trail.
Sa mga may lakaw sa nasabing aldaw, abiso pa kan alkalde na mag-amay na sana urog na sa mga pasiring sa Legazpi airport.
