LEGAZPI CITY- Padagos pang nagbababa an naoobserbaran na nagkapirang aktibidad sa bulkang Mayon makalihis ining ikaag sa Alert Level 3 status.
Susog sa latest volcano bulletin kan Philippine Institute of Volcanology and Seismology (PHIVOLCS), nairehistro kan mga instrumento an nasa 31 na sanang volcanic earthquakes na nagresulta man sa 30 rockfall events o pagrasay kan mga bato.
Dugang pa digdi na sarong lava fountaining event na sana man an naobserbaran sa mga nakalihis na oras kasabay an mahibog na buga kan abo na nag-abot nin hasta 200 metros an langkaw.
Alagad, dagos-dagos man an bulos kan lava na pinakamahihiling kun banggi pasiring sa mga channel kan Miisi, Bonga asin Basud Gullies na nag-aabot naman sa distansyang 3.3 kilometers, 4.5 kilometers asin 1.9 kilometers hale sa crater.
Mantenidong nasa above normal range man an buga kan asupre na maabot sa 2000 na tonelada sa laog kan sarong aldaw.
Katakod kan mga nasabing parametrong pigbabantayan, dae man nagpapabaya an mga opisyal sa pagirumdom kan pagiging alerto sa kun ano pang aktibidad na ipapahiling kan nasabing bulkan.
