LEGAZPI CITY- Pig-uuran na ngonian nin suhestiyon hale sa mga local historian asin artists an lokal na gobierno kan Oas, Albay sa kun papano gigibuhon an mawot na maitindog na whole body iconic symbol ni Miss Universe 2018 Catriona Magnayon Gray sa parke kan nasabing banwaan.
Sa ekslusibong intrevista kan Bombo Radyo Legazpi ki tubong Oas asin Komisyon ng Wikang Filipino (KWF) Komisyoner ng Wikang Bicol Abdon Balde Jr., pwedeng gibuhon an nasabing imahe gamit an clay kun sain magigin ‘mobile’ man ini na maililipat sa lugar na mawot na pagkaganan.
Nag-volunteer man si Commissioner Balde na magsurat nin inscription kun kinakaipuhan mantang ipigsuhestiyon an bistong Albayana artist na si Maria Magdamit na maglilok kan obra.
Dugang pa ni Balde na igwa naman na mga kabisto hale sa ibang nacion na nagpapahayag na mawot pondohan an nasabing sculpture.
Sa ibong na lado, klinaripikar man ni Balde na mas nag-uuyon na ini sa paggibo nin iconic symbol para ki Catriona ngonian kesa sa kinontrang pagribay kan pangaran kan Rizal Park tangarig na isunod sa beauty queen.
Enot naman na ipighayag ni Oas Mayor Domingo Escoto Jr. sa suway na intrevista na pigpaplanuhan na an nasabing iconic image kun matugot an kampo kan 24-anyos na Bicolana beaty.
