LEGAZPI CITY- Piglalaoman na kan nagkapirang tsuper kan jeep an pagkakaigwa nin dugang na presyo sa mga produktong petrolyo sa masunod na semana.
Kun babalikan, inanunsyar kan DOE-Oil Industry Management Bureau na labi sa dos pesos sa kada litro an nahihiling na taas-presyo sa produktong petrolyo sa masunod na semana huli sa tensyon sa Middle East.
Segun kay Ronel Nebres, an chairman kan Basta Driver Safety Enforcer sa intrevista kan Bombo Radyo Legazpi, wara naman na magiginibo an saindang lado kun magkakaigwa nin taas singil sa presyo kan mga produktong petrolyo.
Sinabi kaini na pwedesir ng magfull tank an ibang drivers lunes nin banggi kun igwa sindang kwarta na pangpa full tank.
Istorya kan opisyal na nagdadara man nin ekstrang container an ibang drivers na may puhunan para magpakarga na mantang dae pa nagkakaigwa nin oil price adjustment.
Mientrastanto, maswerte suboot an mga may rutang pasiring sa 3rd District kan Albay huli ta igwa sindang nababakalan sa banwaan kan Camalig na mas murang gasolina.
Sa ngunian, pigpapasalamat na lang kan opisyal na igwang klase an mga estudyante huli sa nakakadagdag pa sa saindang mga pasahero.
