LEGAZPI CITY — Lifted na an ibinabang suspension order sa 69 na quarry sites sa Bicol region makalihis an ipigkondusir na assesment kan Mines and Geosciences Bureau (MGB).
Sa intrevista kan Bombo Radyo Legazpi kay MGB Public Information Officer Byron Suratos, ginibo na kan mga ini an ipigrekomenda nindang mitigation measures asin pig-relocate na an mga residenteng apektado kan saindang quarrying operations.
Sa ibong kaini segun sa opisyal, padagos man liwat nindang pigbabantayan an mountain quarry operations na may dakulang peligro na magkawsa nin pagrasay nin daga kumparar sa river quarry na nakakatabang pa sa pag-desilt kan mga salog.
Pag-eksplikar ni Suratos, kaipuhan na masiertong dae maabot sa 90 degrees an slope kan mga quarry sites asin kaipuhan na igwang proper benching.
Mientras tanto, napag-araman sa paglilibotkan team kan MGB, nadiskubre na igwang mga sites sa Sorsogon na dae nagagamit nin personal safety equipment an mga obrero kaibanan na an pinadarahan kan cease and desist order.
