LEGAZPI CITY – Nabuyagyag sa mga otoridad ang bagong modus kan mga nagbabalong makalusot sa mahigot na border restrictions na ipigpapaotob sa Bicol.
Sa kuhang video na ipinadara kan sarong concerned citizen sa mga otoridad, naaraman an modus kaya tulos na naghiro an tropa kan Land Transportation Office (LTO) Bicol, pulisya, PDRRMO asin militar.
Pag-istorya ni LTO Bicol Asst. Regional Director Vincent Nato sa Bombo Radyo Legazpi, napag-araman na ipiglilipat palan an nasa 20 hasta 30 pasahero hali sa mga colorum o pribadong van pasiring sa sarong truck ngani makalagpas nin warang guranong problema sa control points.
Aminado an opisyal na dai na guranong pighihiling an laog kan mga truck kapag nag-aagi sa control point kan Del Gallego, Camarines Sur.
Wara man na pasahero ang mga van sa pagpasok sa border alagad sa paglagpas sa checkpoint saka na liwat na pasasakayon an mga pasahero hali sa truck.
Pagtataong-doon ni Nato, peligroso an modus urog pang kadaklan sa mga nagbabalong lumusot an hali sa Metro Manila na may halangkaw na kaso kan COVID-19.
Sa isinagibo man na antigen testing puon Marso 30 hasta kasuodma, Abril 4, nasa 100 na ang nagpositibo.
Ipinoproseso na man sa ngunyan an posibleng paninimbagan kan truck driver sa insidente.
