LEGAZPI CITY – Pighihiling na anggulo ngunyan kan Legazpi City Police Station na sarong insidente nin mistaken identity an nangyaring pambabadil sa Barangay Homapon sa syudad kasuodma.
Segun sa hepe kan Legazpi PNP na si P/Supt. Nilo Berdin, bako man an biktimang si Norma Millare, 73 anyos asin residente kan Sitio Crossing an target kan suspek kundi an aki kaining babaye na agom suboot kan sarong pulis.
Alagad dae pa maipaluwas an pangaran kan pulis, dakula suboot an posibilidad na nasala sana an suspek sa binadil kaini.
Sa imbestigasyon kan mga otoridad, nagkataon sana na nagkaturog an gurang kaiba an makuapo kaini sa sala kan harong kun kaya ini an nabadil.
Aram kaya suboot kan suspek na an agom kan pulis an nagkakaturog sa sala alagad kan oras na mangyari an krimen, an biktima an nakapwesto sa sala.
Huli man suboot sa madiklom, dae na nariparo kan dae pa namimidbidang suspek kun sisay an nakahigda sa sala.
Segun man sa bitkima, dae man suboot siyang kalaban o kaiwal kun kaya ini an pighihiling kan mga pulis.
Posible an suboot na may rason sa nasabing insidente na iyong pigtututukan ngunyan kan Legazpi PNP.
Segun pa ki Berdin, dae pa sinda makakapagpaluwas kan resulta kan imbestigasyon huli sa premature pa ini.
