LEGAZPI CITY-Suportado kan nagkapirang senador an pangapudan para sa konkretong lakdang ngani maprotehiran an mga obrero na nadidifisilan huli sa halangkaw na presyo kan barakalon asin hababang pasahod.
Segun kay Sen. Francis “Kiko” Pangilinan, an padagos na paglangkaw kan presyo kan langis, pagkakan, asin pamasahe, haros nauubos na an kita kan mga pamilya.
Kaya suportado ninda an pangapudan para sa wage increase huli ta “bako ini pagkamaherak kundi hustisya.”
Tinawan doon man ni Pangilinan, na dapat mag-krear an gobierno nin mas kadakol pang dekalidad na trabaho asin ayuson an mga sistemang nagpapagabat sa gastuson kan mga namamanwaan.
Mientras tanto, sinabi man ni Sen. Jinggoy Estrada na dapat bako sana pag-omaw an itao sa mga obrero kundi mas matibay na suporta arog kan subsidies asin iba pang ayuda ngani maprotehiran an saindang kabuhayan.
Sa hiwalay na pahayag, pigbubusol man ni Sen. Win Gatchalian an pag-amyenda sa Magna Carta for Public School Teachers ngani mapakusog an proteksyon, benepisyo, asin kondisyon sa trabaho kan mga paratukdo.
Susog sa datos, labi 49 milyong Pilipino an igwang trabaho, mantang milyon man liwat an warang trabaho o naghahanap nin dagdag na oras ngani igwang ganansya.
