LEGAZPI CITY- Labi an kaugmahan kan mga Pilipino sa Paris, France makalihis na makasungkit nin bulawan na medalya an nacion sa paagi kan gymnast na si Carlos Yulo.
Segun ki Bombo International Correspondent Yang Santiago na halos magin emosyunal an mga Pilipino sa pagka proud ki Yulo asin ki Pinay boxer Aira Villegas.
Dae suboot nagpasindak an mga Pinoy fans maski pa mas dakol asin mas makusog an cheer kan crowd para sa kalaban ni Villegas na si Wassila Lkhadiri kan France.
Dugang pa kaini na dae ninda maipaliwanag an saindang namatean kan i-anunsyar an pangaran ni Villegas bilang gana sa women’s 50kg boxing urog pang pigpensar na mangingibabaw an crowd favorite na si Wassila.
Sinabi pa ni Santiago na dae nawawaran nin paglaom an mga Filipino community na makakapag-uli pa nin dugang na medalya an mga Filipino athletes sa mga masunod pang aldaw.
Dakol na man suboot an nagmamawot na makabakal pa nin ticket sa masunod na mga laban ngani na makapagpahayag nin suporta sa mga Pilipino.
