LEGAZPI CITY- Aminado an Department of Agriculture na nagdadakol ngunyan an suplay kan kamatis sa nacion kaya nagkaigwa nin pagbaba sa presyuhan.
Ini makalihis na ireklamo kan nagkapirang mga paraoma sa ibang mga rehiyon na nasa P4 na sana an farmgate price kan kamatis kaya haros nalalapa na sana an mga ini.
Segun ki Department of Agriculture Bicol spokesperson Lovella Guarin sa intrevista kan Bombo Radyo Legazpi na ini an rason kaya pig-eenganyar an mga paraoma na magin parte kan mga asosasyon.
Paliwanag kan opisyal na sa siring na paagi, matatabangan an mga paraoma na magkaigwa nin market sa saindang mga ani asin matabangan an mga ini na magkaiwa nin development plans.
Dugang pa kan ahensya na an mga paraoma na igwang darakulaan na volume nin ani an pwedesir na mag-message sainda ngani na makapag contact nin mga buyers kan saindang produkto.
Segun pa ki Guarin na nagtatao man an Department of Agriculture nin mga processing facilities asin nagdi-develop nin mga teknolohiya sa pagproseso nin mga produkto ngani na maibitaran an pagkasayang kun nagkakaigwa nin oversupply.
