LEGAZPI CITY—Padagos an pagsagibo nin search and rescue operations kan mga otoridad sa sarong lalaking nawawara huli kan nakalihis na pagbaha na dara kan shearline sa isla provincia kan Catanduanes.
Segun ki Coast Guard Station Catanduanes Chief of Staff Ensign Jepril Bitas, sa intrevista kan Bombo Radyo Legazpi, binisto an lalaking nawawara na si Jose Taraya Bernal, 56-anyos, may agom, asin residente kan Barangay Obo, San Miguel kan nasabing provincia.
Basado sa report na apat sindang bangkero an inabot nin nagraragasang tubig mantang pigse-secure an saindang bangka kun saen tulo digdi an matrayumpong narespodehan kan mga otoridad, alagad an nasabing biktima an inanod suboot nin makusog na pagbabaha huli sa padagos na pag-uuran.
Tulos man na nag-deploy an saindang grupo nin deployable response team asin nagsagibo nin survey search, troop patrol asin boat operations gamit an floating assets sa kahalabaan kan salog puon San Miguel hasta sa may parte kan kadagatan kan Bato kan naumbitang provincia.
Dugang kan opisyal na sagkod sa presente dae pa ninda nahihiling an biktima asin magpapadagos an saindang operasyon nganing mahanap ini.
Mientrastanto, mahigot man na pigpagiromdoman kan Coast Guard Catanduanes an publiko na magin mapagmatyag, dae maglawod kun maraot an panahon asin istrikting magsunod sa abiso kan mga ipigpaluwas na sea travel advisory. Siring man na en kaso igwang emerhesnsya an tulos na makipagkoordinar sa siandang ahensya asin lokal na gobierno para sa tulos na pagresponde.
