LEGAZPI CITY – Nagsakat na sa 486 katawo an mga naarestar sa nagpapadagos na anti-illegal gambling operations kan kapulisa sa bilog na rehiyon.
Katakod kaini, kan pinuunan kan mga otoridad an operasyon kan Pebrero 3 sa presenteng taon, uminabot na man sa kantidad na P77, 173 an nakumpiskang kwarta sa mga pasugalan.
An Albay PPO an nakapag-arestar nin 106 na persona sa ipigkondusir na 29 operasyon mantang an Camarines Sur PPO man an igwang pinakadakol na naarestar na uminabot sa 154 katawo sa saindang 42 na positibong operasyon.
An Camarines Norte PPO man an igwang naarestar na 77 katawo mantang an Catanduanes PPO an igwang 50 katawo asin nakapagkumpiskar nin kabilugan na P24,854.
Dugang pa digdi an 36 persona na naarestar kan Masbate PPO, 42 katawo sa Sorsogon PPO, asin 21 persona man sa Naga CPO.
Pinaglalaoman man na madudugangan pa an nasambitan na mga numero sa pagpapadagos pa kan pinahigot na operasyon kan mga otoridad.
