LEGAZPI CITY – Puga puga na an preparasyon kan mga kapulisan sa banwaan nin Polangui pirang aldaw antes an pirilian.
Segun ki Polangui Municipal Police Station Chief of Police, Police Lieutenant Colonel Henry Red sa intrevista kan Bombo Radyo Legazpi na nagtaong asistensya na sinda sa Commission on Elections sa paghahatod nin Automated counting machines sa 42 na voting centers sa saindang banwaan.
May mga kapulisan man na nakamonitor sa gabos na pigbugtakan kan mga Automated counting machines nganing mairayo an mga ini sa presensya kan mga mararaot na elemento.
Dae man suboot nagkaigwa nin aberya sa mga isinagibong final testing asin sealing kan Automated counting machines.
Pigtaram pa kan opisyal na matenir an saindang mga tropa sa mga polling precincts sa oras na mai-deliver na man an mga balota na gagamiton sa Mayo 12.
Magigin katabang man ninda sa pagbantay sa nagdadangadang na pirilian an augmentation support na hale sa Phillipine Army.
Mawot niya na pilion nasa kan mga botante an napupusuan nindang kandidato asin dae na suboot magkawsa nin kariribukan nganing mangyari an malinig asin matuninong na pirilian.
Promesa ni Red sa publiko na siring kan kasuguan kan PNP Chief an padagos an pagtatao ninda nin seguridad nganing mamantenir an pazy orden sa banwaan nin Polangui ngonian na 2025 National and Local Election.
