LEGAZPI CITY – Pighayag kan Commision on Elections na warang nanotarang mga kandidato asin campaigner kaini sa provincia kan Albay na nagbayolar sa mga election laws arug kan vote buying.
Segun ki COMELEC Albay Election supervisor Atty. Ma. Aurea Bo-Bonao sa intrevista kan Bombo Radyo Legazpi na maski wara sindang nanotaran hasta sa ngonian an dae man ninda pigsasarado an posibilidad na may nagbabayolar sa mga ley na ipigbugtak kan komisyon.
Pwedesir suboot na iderekta sa central office o sa regional office kun may pruweba sinda na nagbabayolar an sarong kandidato kasabay na an saindang complaint affidavit.
Enkaso may naresibi sindang mga reklamo an kaipuhan ninda ini iberipika asin isairarom sa due process bago magpaluwas nin show cuase order nganing dae man suboot masayang an saindang aksyon.
Paglilinaw ni Atty. Bo-Bonao na maski dakol an nagasumbong na may insidente nin vote buying an dae ninda matatawan nin aksyon kun wara man ining karibay na magkakanigong ebidensya.
Mientrastanto, inanunsyar man kan opisyal na nakatalaan ideliver sa masunod na semana sa mga ciudad asin mga munisipyo an mga Automated Counting Machine asin balota na gagamiton kan provincia sa maabot na Mayo 12.
Padagos man an saindang pagsasagibo nin refresher course sa gabos na mga electoral board nganing dae man suboot malingawan kan mga ini an saindang nanodan sa training na isinagibo kan nakalihis na mga bulan.
Pagsyerto niya man na on track an saindang timeline mapadapit sa saindang preparasyon para sa nagdadangadang na 2025 Midterm Election.
