LEGAZPI CITY – Ibinida kan Task Force Kalinigan asin Kaayusan na nagin matrayumpo asin matuninong an isinagibong parada asin iba pang aktibidad sa ciudad kan Legazpi katakod kan pagselebrar kan Independence Day.
Sa intrevista kan Bombo Radyo Legazpi ki Task Force Kalinigan asin Kaayusan Head Andy Marbella, sinabi kaini na makaogma huli ta wara nin nairehistrong masyadong kalat nin mga basura sa tinampo.
Nangangahulugan sana ini na nakanuod na asin disiplinado an an mga tawo.
Segun ki Marbella, wara man nin nairehistrong anumang mga dae pinaglalaomang insidente durante kan nasabing selebrasyon sa ciudad.
Ini an huli ta kadakol na mga kapulisa an nakalakop partikular na sa mga lugar na pinagsagibuhan kan aktibidad.
Sa ngonyan, dagos-dagos an ipigsasagibong clearing operation kan task force bilang paghahanda sa paparaning Ibalong Festival.
