LEGAZPI CITY- Naglilibot ngonian an Land Transportation Office (LTO) Legazpi sa manlaen-laen na eskwelahan tangarig na magtao man nin lectures dapit sa road safety awareness asin mga bagong ley trapiko na pig-iimplementar.
Sa intrevista kan Bombo Radyo Legazpi ki LTO Legazpi chief Grace Roxas, mayor na target kan mga pagtukdo an mga estudyante puon sa elementarya mientras na igwa man sa sekondarya asin kolehiyo.
Pag-eksplikar ni Roxas na mas marhay kun amay pa, aram na kan mga estudyante kun papano magigin responsable sa tinampo.
Kaibanan sa mga regular na tema kan mga ipigsasagibong pagdiskutir an Republic Act 10666 o The Children’s Safety On Motorcycles Act of 2015 siring man an Republic Act 10913 o an Anti-Distracted Driving Act (ADDA).
Ipigsasagibo an mga nasabing lectures sa amay na pagkaaga antes an alas-8:00 nin aga na piglalaoman naman an servicio kan mga personahe sa mga nagpapasyar sa LTO.
Ikinakaogma man kan opisyal na an nagkapirang eskwelahan na mismo ang nagre-request sa lecture na pig-aabot nin kabangang aldaw minsan.
