LEGAZPI CITY — Amay na ma-byahe pasiring sa San Jose de Buenavista, Antique an nasa 650 delegado kan Bicol para sa Palarong Pambansa 2017.
Sigon ki Engr. Ronald Asis, Secretary General kan Palarong Bicol Board, 12 mga bus an mahale gikan sa rehiyon ngani na makipaglaban sa 17 rehiyon para sa manlaen-laen na sports.
Pag-abot sa nasambitan na venue, magkakaigwa suboot nin 15 diyas na concentration training puon Abril 7 sagkod Abril 22.
Opisyal na bubukasan an Palaro sa Abril 23 na matatapos sa Abril 29.
Sinabi man ni Asis na nagkaigwa sinda nin press conference kun sain tinukar an saindang mga preparasyon para sa sporting event na nasunudan kan pagdistribuir sa mga uniporme asin iba pang gamit sa mga pambatong atleta.
Kan nakalihis na taon, nagtapos sana sa 11th spot an Bicol kun sain ineksplikar ni Asis na nabanga kaya an atensyon kan mga komite sa pagpreparar bako sana para sa mga atleta alagad para na man hosting kan dakulang event.
Ngunyan na taon, piglalaoman na ma-angat an mga Bicolanong atleta huli na man sa urog na halawig na panahon asin tinutukan na training.
Magigirumduman na sa Albay Tourism and Sports Complex sa Bicol University isinagibo an Palarong Pambansa 2016.
