LEGAZPI CITY – Nagtutubod an sarong political analyst na mawawara an mga korap na pulitiko kun magigin maray an pagpili kan mga botante sa saindang ipapatukaw sa posisyon.
Ini an kasunod kan dae matapos-tapos na isyu sa katiwalian partikulamente na sa pamosong flood control scandal.
Segun ki Bicol University-Political Science Department and Far Eastern University Prof. Amr Solon Sison sa intrevista kan Bombo Radyo Legazpi na nagigin parte kan mga tiwaling pulitiko an saindang mga suportadores huli ta sinda man sana an naggigibo nin paagi nganing makatukaw sa posisyon an sarong opisyal asin mahabon an kaban kan banwaan.
Matatawan man suboot nin linaw kun siisay an mastermind sa mahewasang korapsyon kun umuli sa Former Congressman Zaldy Co sa Pilipinas asin patunayan na “good soldier” sana siya kan mas halangkaw na pulitiko.
Pigtaram pa kan nasambitang political analyst na an mga pahayag na mga piggigiribo kan pigtuturong imbwelto sa nasambitang anomalya an puro nagtutururuan man sana kun kaya dapat magkaigwa nin pormal na pagdangog asin mag-atendir si Co nganing matawan na ini nin linaw.
Pig-aabangan niya man an mangyayari sa mga mahiwasang rally na pwedesir gamiton kan mga kritiko kan presenteng administrasyon.
Alagad nagmamawot man siya na magpadagos na an piggigibong pagdangog kan Senate Blue Ribbon committee nganing magluwas na an katotoohan asin dae na dapat magkaigwa nin cliffhanger.
Pigtaram pa ni Sison na huli sa mga nangyaring pagbabaha na kawsa kan magkakasunod na makukusog na bagyo asin huli sa rebelasyon ni Co an magigin aktibo an publiko sa pag-antabay sa mga masunod na mangyayari mapadapit sa isyu kan flood control projects.
