LEGAZPI CITY – Suportado kan mga barangay sa ciudad kan Legazpi an ipigpaluwas na executive order no.1 ni Mayor Hisham Ismail kun sain pigsugo kaini an immediate clean-up, declogging asin desilting operations kan mga drainage systems.
Segun ki Kapitan Harold Bembenuto kan Barangay Padang sa intrevista kan Bombo Radyo Legazpi na suportado ninda an kasuguan nganing makapreparar na sinda bago pa umabot an mga serye nin warang patod na pag-uuran sa ciudad.
Bago pa suboot ipaluwas an nasabing executive order an nakatalaan na nindang isagibo an naunambitang inisyatiba.
Mapaparikas man an saindang execution kan paglilinig kan mga drainage system huli ta makakatabang ninda an pirang ahensya kan gobierno lokal.
Pigtaram pa kan opisyal na obligado na man sindang magsumite nin monitoring asin progress report sa City Disaster Risk Reduction and Management Council asin iba pang departamento nganing masyertong napapaotob nin maray an naunambitang kasuguan.
Pigtuga niya man na saro an pagbabaha sa pinakaproblema kan saindang barangay tuyong tag-uran huli sa mga nakapalibot na mga agihan nin tubig asin dagat.
Nakalaag man sa nasambitang kasuguan na pwedesir man sindang magdugang nin mga volunteers nganing makatabang ninda sa mga serye kan paglilinig nin mga kanal sa saindang lugar.
Pagdoon man ni Kapitan Bembenuto na sa mismong harong nagpopoon kun pano iibitaran an pagbaha sa paagi kan proper waste dispossal nganing maibitaran an pagkabara kaini sa mga kanal.
