LEGAZPI CITY—Padagos an pagkukundusir kan Masbate Bureau of Fire and Protection nin mga aktibidades para maibitaran an kasulo sa pagselebrar kan holiday season sa probinsya.
Segun ki Fire Chief Inspector Nepthalie Pusing, an Provincial Fire Marshal kan BFP Masbate sa intrevista kan Bombo Radyo Legazpi, na puon kan Disyembre 1 nagpuon na sindang maglibot sa mga commercial district asin iba pang lugar para magpatanid sa mga kahimanwa mapadapit sa pag-ibitar sa kasulo siring man an kampanya ninda laban sa paggamit nin paputok.
Dugang pa kaini na may plano sindang mag-implementar nin istratehiya para makumpiskar an mga ilegal na paputok siring kan improvised na boga na kun saen pwede ining ipalit sa bagas.
An saindang ahensya nakikipagkoordinar man sa Department of Health, sa mga kapulisan asin lokal na gobyerno para masugpo an paggamit nin mga paputok.
Ipig-engganyar man kan opisyal an mga lokal na gobyerno na magsagibo na sana nin centralized fireworks display ta nganing maghiling na sana an saindang mga kahimanwa para maibitaran an ano man na kasulo asin iba pang mga aksidente.
Mientrastanto, sinabi man kan opisyal naka-heightened alert an saindang opisina asin naglatag naman sinda nin mga personahes ngunyan na holiday season.
Nagpaguiromdom man ini sa publiko na magin alerto sa pagselebrar kan Kapaskuhan asin Bagong Taon para maibitaran an kasulo sa mga kaharongan.
