LEGAZPI CITY- Nairehistro an pagbaba sa crime rate sa provincia kan Sorsogon puon Enero hasta Hunyo sa presenteng taon.
Segun ki Sorsogon Police Provincial Office Police Community Affairs and Development head Major Arwin Destacamento sa intrevista kan Bombo Radyo Legazpi na dakulang bagay digdi an nagin deployment kan mas dakol na personahe sa mga lugar na dating igwang halangkaw na kaso nin kriminalidad.
Dugang pa kan opisyal na dakula man an naitabang kan motorcycle patrol asin bicycle payrol sa mga strategic location sa provincia.
Afuera digdi, sinabi kan opisyal na igwa man na kanya-kanyang mga programa na pigpapaotob an mga municipal police stations ngani na mabantayan an paz y orden sa saindang mga area of responsibility.
Sa ibong kaini, inako ni Destacamento na ngunyan na Hunyo, naglangkaw an mga kaso nin panlulugos.
Huli digdi, pigtututukan na suboot ngunyan kan mga kapulisan an nasabing aspeto ngani na maibitaran na madugangan pa an mga biktima nin rape cases sa lugar.
