LEGAZPI CITY- Klinaripikar kan Land Transportation Office (LTO) na government plates pa man sana an nag-aabot sa oficina asin wara pa man na mga plaka para sa pribado asin pampublikong behikulo.
Sa intrevista kan Bombo Radyo Legazpi ki LTO Legazpi spokesperson Grace Roxas, nagkaigwa pa man sana nin partial release alagad piglalaoman na matatapos na ngonian na taon an manufacturing kan iba pang plaka.
Dakulang tabang segun ki Roxas an pagkakaigwa nin makina kan central office na igwang kapablidad na magproduce nin hasta 20,000 plates sa laog nin sarong aldaw kumpara sa mga plakang kinakaipuhan pang i-import.
Dawa man pighihiling na mahahaluyan sa pagdistribuer, inasegurar man kan opisyal na makakaresibe kan replacement plates an gabos urog na rehistrado naman an mga ini sa system.
Magigirumduman na taong 2016 kan ipundo an pagrelease kan mga nasabing plaka kaya naapektaran an issuance sa mga drayber na nagpaproseso sa bilog na taong 2015.
