LEGAZPI CITY-Inaprubahan na kan Kamara an House Bill No. 7239 o an “Line Workers Insurance and Benefits Act” na obhetong tawan nin mandatory insurance coverage an rinibong electrical asin telecommunications line workers sa nacion.
Pigtatawan nin pagbisto kaini an mga line workers na pigkokonsiderang “vital link” sa suplay kan kuryente asin komunikasyon na nagpapadalagan sa ekonomiya.
Kaiba sa mga benipisyo sa irarom kan propwesto an Compulsory Insurance, pagsagot kan mga employer sa premium para sa life, accident, asin disability insurance kan mga kawani.
An kantidad kan coverage sakop an minimum na insurance benefit depende sa kumpanya.
Kaiba an Electric Cooperatives, poon P200,000 sagkod P1 milyon; Private Distribution Utilities (PDUs) na nasa P1.5 milyon; asin an National Transmission Corporation o Grid Operator na nasa P2 milyon.
Afuera sa insurance, obligadong magtao an mga employer nin retirement benefits, mortuary assistance, asin reimbursement kan medical expenses para sa mga danyos na natamo mantang nasa trabaho.
Sakop kan propwesto an gabos na line workers sa mga telecommunications companies, power line contractors, private utilities, asin mga electric cooperatives sa bilog na Pilipinas.
