Malilipot Tourism Office aminado na habong ipagbawal an pagsakat sa Mayon alagad pigduon na dapat na inuton an seguridad kan mga turista

LEGAZPI CITY- Nagkaigwa nin orientation an mga otoridad sa 31 na mountaineers na nadakop na nagsakat sa Bulkang Mayon ngani na maipaaram sa mga ini an saindang nabalgar na polisiya sa ginibong aktibidad.
Katakod kaini, nakatalaan na magbayad an mga ini nin P5,000 na multa ngani na makalaya na asin dae masangatan nin kaso.
Napag-araman na banggi nagsasakat an mga ini asin kada weekend nagbababa kaya dae nadadakop kan mga otoridad.
Segun ki Rome Candaza kan Malilipot Tourism Office, pinagbabawalan ninda ngunyan an mga turista na magsakat sa nasambitan an bukid huli ta nakasakat pa ini sa alert level 1 asin posibleng malaag sa alanganin an seguridad kan mga masakat digdi.
Dugang pa kan opisyal na habo na nindang mautro an nangyaring trahedya kan 2013 kun sain igwang mga dayuhan na binawian nin buhay makalihis na madisgrasya sa pagsakat kaini sa sa Mayon.
An matrayumpong pagka aprehindir sa nasambitan na mga mountaineers an resulta kan pagtatarabangan kan manlaen laen na ahensya kan gobyerno, PNP personnel, LGU Malilipot asin iba pang mga opisyal.
Mientrastanto, inako man ni Candaza na maski sinda habo man na pagbawalan an pagsakat sa Mt. Mayon alagad kinakaipuhan na inuton an seguridad kan gabos urog pa target kan probisnya kan Albay an zero casualty.