May karapatan an Office of the President na magkaigwa nin confidential asin intelligence funds lalo na ta si Presidente Ferdinand Marcos Jr. an commander-in-chief asin chief architech kan national policy asin national security.
Segun ki Palace Press Officer USec Claire Castro kaipuhan kan pondo kan Presidente para sa mga aktibidad asin proyekto na may kinaaraman sa pagbabantay sa seguridad kan nacion.
Simbag ini ni Castro makalihis kwestyunon kan pirang kritiko an propwestong confidential asin intelligence funds kan Office of the President, sa irarom kan 2026 National Expenditure Program.
Ipinunto ni Castro na bako maraot an confidential asin intelligence funds kun ini gagamiton sa tama.
Nagigin maraot suboot ini kun piggagamit sa sala kan sarong corrupt na opisyal.
Susog sa DBM, nagbaba nin 11 porsyento an alokasyon kan confidential asin intelligence funds sa propwestong 2026 national budget.
Basado sa 2025 General Appropriations Act nasa P12.1 billion an pondo para sa confidential asin intelligence funds.
Mientrastanto sinimbag man kan Palasyo an banat ni dating Finance Usec. Cielo Magno, na warang pinagkaiba si Presidente Marcos, Jr. ki Vice President Sara Duterte, kun padagos man siyang mahirit nin confidential asin intelligence funds, sa ibong kan katotohanang nakukurakot suboot an nasabing pondo.
Sa irarom kan propwestong 2026 national budget nasa P10.77-billion an alokasyon para sa confidential asin intelligence funds kun saen nasa P4.5-billion an nakatagama sa Office of the President.
An National Intelligence Coordinating Agency an igwang P1.1 billion confidential asin intelligence funds, an Department of National Defense an may P1.8 billion mantang an P2.2 billion an pagbabarangaon kan Anti-Money Laundering Council, National Security Council asin Philippine National Police (PNP).
Nagin kontrobersiyal an confidential asin intelligence funds makalihis maobserbaran an salang paggastos kan Office of the Vice President asin kan Department of Education sa irarom kan pamamayo ni VP Sara Duterte.
