LEGAZPI CITY – Kinontra kan Makabayan Bloc an naging anunsyo kan National Economic Development Authority na nasa P64 sana an kaipohan kan sarong Pilipino ngani na maikonsidera na dae na nagtitios sa pagkon o bakong “food poor.”
Sa intrevista kan Bombo Radyo Legazpi kay Kabataan Partylist Rep. Raoul Manuel, kwenistiyon kan kongresista kung sain nagbabase an ahensya sa saindang mga pag-aadal na harayong maray sa katotoohan.
Kung pagbabasehan kaya an presyo kan mga barakalon ngunyan, kulang na kulang na an P64 para sa sarong karaonan kung kaya imposibleng mapagkasya pa ini sa sarong aldaw.
Kulang na kulang man an nasabing kantidad ngani na magkaigwa nin masustansyang makakaon an kada Pilipino.
Duda an Kongresista na posibleng pigtutuyo sana ini kan ahensya ngani na masabing nagdidiit na an mga nagtitios na Pilipino.
Pangapudan ni Manuel sa mga opisyales kan National Economic Development Authority na magluwas sa saindang mga opisina asin hilingon an totoong sitwasyon kan mga Pilipino ngani na maaraman kung may katotoohan pa an mga piggigibo kaining pag-aadal.
