LEGAZPI CITY- Pighahaditan na bumigay asin maputol na man an main road na nagkokonektar sa mga banwaan kan Guinobatan asin Jovellar sa Albay en caso maghaloy pa an mga namamateang pag-uran hasta sa aga.
Enot naman na naaraman na siyam na span kan nasabing tinampo an nagbagsak kaibanan na an sidewalk asin kanal huli naman sa paglumoy kan daga asin pundasyon.
Sa ekslusibong intrevista kan Bombo Radyo Legazpi ki Jovellar Mayor Jorem Arcanghel, duwang spillway man suboot na nagkokonektar sa pitong barangay an dae na maagihan huli sa halangkaw na lebel kan baha, partikular na an access roads kan Brgy. Aurora asin Quitinday na nag-abot na sa duwang eskalon an langkaw kan tubig asin lawig na 30 metro.
Katakod kaini, pinagbawalan na munang mag-agi an mga magagabat na behikulo urog na an may mga kargang quarry materials asin trucks kan mga contractors.
Dae man suboot mahatudan nin tabang an nagkapirang mga barangay na na-isolate kan baha siring kan mga barangay kan Quitinday, White Deer, Salvacion, Florista, Del Rosario, San Isidro asin San Roque sa upland mantang kinakaipuhan munang maglibot sa kataid na banwaan kan Pioduran tangarig na maitao sana an relief sa mga barangay kan Bagacay, Bautista, San Vicente, Dela Paz at Maogog.
Klinaripikar man kan opisyal na may pinapa-construct na man na diversion road an gobierno alagad nasa 80% completion pa sana kaini asin dae pa magagamit.
